Qytetarët e Las Vegasit të mërkurën, për herë të parë pas 30 viteve, kanë mundësi të shikojnë se si bie borë në qytetin e tyre. Shërbimet meteorologjike këtë dukuri të pazakonshme ia përshkruajnë stuhisë së borës që është jokarakteristike për Nevadën jugore.
Nëpër rrugët e kryeqytetit të industrisë amerikane të zbavitjes, të vendosur në shkretirë, gjatë natës ka rënë ndërmjet 7,5 deri 15 centimetra borë.
Borë për herë të fundit në Las Vegas ka rënë në vitin 1979, kur janë regjistruar rreth 20 centimetra, ndërsa në vitin 1949 kanë rënë 45 centimetra rekorde të borës, përkujtojnë gazetat lokale.
Bora, për të cilën duhej pritur tri dekada, shkaktoi mahnitje të vërtetë te fëmijët, e aq më shumë i gëzoi vendimi i autoriteteve të qytetit që përkohësisht të mbyllen shkollat.
Të moshuarit nuk kanë qenë aq shumë të disponuar, kryesisht për shkak të problemeve me komunikacionin, si dhe vendimit që të mbyllet aeroporti ndërkombëtar.
Meteorologët paralajmërojnë se bora do të vazhdojë të bie gjatë ditës së sotme, ndërsa do të kthjellet të premten.